Litehge li Afrika ikolbaha ni yigil i mbog ngwañnaga ni ngambi i minsongi? Dibééak i litédés dikuyenge di mahop

I len ini, ingéda disie mahol ma ncep u yigil unsébla le Yigil i Mbog ngwañnaga ni ngambi i minsongi, innenne ini yigil iyé kikii njel i litôdôl unu ncep, ndi he pakpak bé kikii njel libéak, lihohlak tole libamblak li yondo inyu litambal bipôdôl to bitilna, dikôm to nyandinya i minson mi bôt ba binam (dihuu di môô), ni nguy i bisélél tole makénge ma hélha (kikii bo likenge li ngambi i minsongi inyu ihégda pôk to mbimba i ngim mam). Lini ligwelek li nson li yondo, i ka ini le, li nsobna nyandinya i mincep mi nson inyu isange ni libok mayaa ma dikôm inyu yigil i libak li mut binam, inyeñ yaga i yelel mbale isôli ni ndip yi ihuli isi magwelek, minsélél mi Mbog, yi i Mbog, mapôdôl, makenge ni ndôñ i dikôm di niñ di matén ni maloñ. Mambadga dinla ni badba ingéda dinsule inya nson ini, momana le: « kinje mahee batoñol yi ni bayimam ba Afrika ba nti Yigil i Mbog ngwañnaga ni ngambi i minsongi? Ni mambe manjel ini njel i yigil i nene ikédé minson nwap ni biniigana gwap? Umbe nseñ Yigil i Mbog ngwañnaga ni ngambi i minsongi igwééne bôt ikédé niñ yap i hikel ni ikédé mahol ma mincep mi nhôlôs yi i kéndi i Mbog i Africa?». Ikéde unu nkwel me nhégda, mega bôdôl ndugi ni iwan ndôñ i dipa dimboñla ikédé Yigil i Mbog ngwañnaga ni ngambi i minsongi i Afrika, ni lelaa bayi mam bangwélél ini yigil ikédé minson nwap. Tôbôtôbô, mega yéñ yelel lelaa Yigil i Mbog ngwañnaga ni ngambi i minsongi ingwéélana inyu litédés dikuyenge di mahop (tétén i matunga ma mbok mankot mintén ndi mintén mi matén i loñ i Kamalôn), iba bé ihôya itoñol lelaa ini yigil innit yéñe ni njômbi mahol bi matén ma Afrika ni dikuu di yigil ni di hôlôs yo. Diga sôk i nunda kinje botñem Yigil i Mbog ngwañnaga ni ngambi i minsongi inla bana inyu lihôlôs manjel ma hôlôs yi Afrika.

Miño mi bibuk: Yigil i Mbog ngwañnaga ni ngambi i minsongi, litehge li Afrika, liyônôs Yigil i Mbog ngwañnaga ni ngambi i minsongi, litédés dikuyenge di mahop, mbuu i magwéélak ma Mbog.